Listmeðferð er sjálfstætt meðferðarform þar sem myndræn tjáning er notuð markvisst til að vinna úr reynslu og upplifun einstaklingsins.

Í listmeðferð er einstaklingnum veitt tækifæri til að tjá tilfinningar sínar og hugarheim með litum, leir og öðrum myndlistarefnivið í öruggu umhverfi undir umsjón listmeðferðarfræðings.

Sú myndræna nálgun sem notuð er veitir oft aðgang að djúpstæðum þáttum í tilfinningalífi einstaklingsins sem talað mál megnar oft ekki að gera.

Myndsköpunarferlið og sambandið við listmeðferðarfræðinginn getur hjálpað einstaklingnum að tjá ýmsar tilfinningar og hugsanir sem hann hefur ekki náð að koma orðum að og þannig aukið sjálfskilning og sjálfsmeðvitund.

Listmeðferð er runnin frá stofni sállækninga (psychodynamic) og kenninga um listsköpunarferlið.

Í listmeðferð er lögð áhersla á sköpunaraflið sem er öllum eiginlegt og er leitast við að efla það.

Í vinnuferlinu er ekkert rétt eða rangt og er því engin þörf á færni í myndsköpun. Takmarkið er ekki að gera listaverk eða “fallega mynd”. Sköpunarferlið sjálft er jafn mikilvægt og útkoman.